ខេត្តបាត់ដំបង:កម្លាំងនៃអធិការដ្ឋាននគរបាលស្រុកសង្កែ សហការជាមួយកម្លាំងប៉ុស្តិ៍នគរបាលរដ្ឋបាលនរា បានចុះធ្វើការស៊ើបអង្កេតស្រាវជ្រាវរហូតបង្រ្កាបឃាត់ខ្លួនជនសង្ស័យម្នាក់ក្នុងករណីអំពើលួចយកម៉ូតូ។
ជនសង្ស័យត្រូវបានឃាត់ខ្លួនឈ្មោះ ហាន រំម្លី ហៅ ដុង ភេទប្រុស អាយុ៣៥ឆ្នាំ មានទីលំនៅក្រុមទី១១ ភូមិនរា១ ឃុំនរា ស្រុកសង្កែ ខេត្តបាត់ដំបង និងបានដកហូតម៉ូតូ០១គ្រឿងម៉ាកហុងដាស្គុបពី ពណ៌ស ស៊េរីឆ្នាំ២០១៤ លេខតួ/លេខម៉ាស៊ីនKT110 DE-8055213 ពាក់ផ្លាកលេខ បាត់ដំបង 1W-0119។
សមត្ថកិច្ចបានបញ្ជាក់ថា នៅថ្ងៃទី១៥ ខែមករា ឆ្នាំ២០២៣ វេលាម៉ោងចន្លោះ២២និង៣០នាទី ដល់វេលាម៉ោង០៦និង០០នាទី ឈានចូលថ្ងៃទី១៦ ខែមករា ឆ្នាំ២០២៣ នៅចំណុចក្រុមទី០៦ ភូមិនរា១ ឃុំនរា ស្រុកសង្កែ ខេត្តបាត់ដំបង មានករណីបទអំពើលួច (លួចយកម៉ូតូ) មួយកើតឡើងបង្កដោយជនមិនស្គាល់អត្តសញ្ញាណ មិនដឹងចំនួន បានធ្វើសកម្មភាពលួចយកម៉ូតូចំនួន០១គ្រឿងរបស់ជនរងគ្រោះឈ្មោះ សុខ អាប់ឌល់សើម៉ាត់ ភេទប្រុស អាយុ២០ឆ្នាំ មានទីលំនៅចំណុចកើតហេតុខាងលើរួចជិះយកគេចខ្លួនទៅបាត់។
ក្រោយពេលទទួលបណ្តឹងផ្ទាល់មាត់រួច កម្លាំងអធិការដ្ឋាននគរបាលស្រុកសង្កែ សហការជាមួយកម្លាំងប៉ុស្តិ៍នគរបាលរដ្ឋបាលនរា បានធ្វើការស៊ើបអង្កេតស្រាវជ្រាវរហូតបង្រ្កាបឃាត់ខ្លួនបានបន្ទាប់មកកម្លាំងជំនាញកំពុងកសាងសំណុំរឿងបញ្ជូនតាមនីតិវិធីច្បាប់៕
